夫人法式甜品店 (已結業)

好耐无去过深水埗西九龙中心，听讲呢头有间好厉害既沾面，所以就特登去试下，食完面想食下甜品，所以去左foodcourt睇下。见到哩个小店门面贴满宣传既甜品照片，见到有两个人买紧嘢好似几okay，所以就跟著排队顺便八卦其他人食咩。排我前面嘅小姐指住隔篱张相话要法式枫糖牛角布甸（$38)，所以到我既时侯我就照叫哩个。老板仲话哩个甜品啱啱焗起，所以唔洗等！老板好兴奋咁响我介绍佢自己既资历，好似喺系高级酒店工作过，所以d甜品都系酒店级既，同其他店卖既唔同。佢仲插左支花俾我影相靓d㖞。😂一坐低即刻食，食落热辣辣配雪糕真系好正，个牛角布甸口感俾普通面包布甸好好多，牛角包里面既层次令佢个包不致于过湿。连平时对甜品一般既老公都话几特别几好食（可能因为个酱系云尼拿，佢特别钟意vanilla）。哩个咁特别，所以谂住叫多个甜品试下，由于已经饱饱地，所以叫左朱古力蛋糕，店主仲好好送左杯玫瑰花茶俾我。店主千叮万嘱我摆一摆个蛋糕先食，因为之前系雪住，会硬身d。可惜我等唔切，食咗先讲，老实讲哩个蛋糕好普通，唔系我预期咁浓咁滑。如果你有机会去试下，都系叫法式牛角布甸啦！