添好運點心專門店 (已結業)

今日重临呢间已有十年多历史，曾被米芝莲推介🎖，专卖广东式点心嘅添好运。随著呢种形式嘅点心专门店开得越来越多，店外已经无大排长龙嘅风光，但店内仍然坐满食客。有啲点心系出边未见过，所以好想试，叫吓叫吓就叫咗8⃣️样点心，两个人食...ok啦‼️招牌点心——酥皮焗叉烧包系必食之选，咁多年都可以保持水准。牛油酥皮香味扑鼻，入口甘香松化，面包松软微甜，叉烧大件Q弹又味浓，正到不得了👍。晶莹鲜虾饺确实晶莹通透，虾饺皮相当薄，虾肉亦好新鲜弹牙👍。豉汁蒸凤爪虽然能够做到骨肉分离，但味道好淡。其他点心嘅味道亦未见突出，黄沙猪润肠超滑嫩，但猪膶太细件，亦淡而无味。姜葱牛肉角款式特别，牛肉弹牙入味，但系配合酱汁食就有啲格格不入。XO酱芋头糕煎得太㶶太实。如果店舖能够将特色点心嘅卖相同美味做得更加好，亦同时保留传统出边少有嘅点心，咁佢应该可以重振声威🥳🥳。