味千拉麵

营业中

休息中

N年冇食过味千拉面，细个屋企附近有味千，都食过一两次，不过𠮶时味千相对其他食店黎讲唔算平，所以都唔会成日食，自从近年越黎越多日牌拉面黎香港开店，都会想试下新野。而家因为冇晚市堂食，想食拉面都只可以外卖，见味千外卖拉面可以加$3转发热包，就算外卖都可以食倒热辣辣嘅拉面，就黎试下。六点laste order，今日咁啱喺附近做完野先赶得切黎。外卖自取布八折，等左大约10分钟就拎得。叫左个拉面、小食同野饮。拉面同汤包系分开。拉面外盒就有教大家点样整热辣辣嘅拉面。打开拉面盒，里面系分左上下两格，上面放左拉面同配料，下面系发热包。要发热包发热，首先要拆开发热包出面个胶袋先，之后就加水去到外盒指定𠮶条线度，水唔可以盖过发热包，之后就将汤包倒入拉面入面，放返好拉面，再闩返埋盒盖焗佢几分钟就得。海鲜拉面($58) - 拉面入面有虾、鱿鱼、蟹柳、帆立贝、粟米同杂菜，都算足料，我另外加左两片叉烧($12)。拉面我要求要硬少少，都真系唔会太腍，叉烧偏肥，所以入口好滑。虽然以前觉得味千嘅拉面唔平，但十几廿年过去，佢嘅价钱又冇想像中加咁多，讲味道或者佢及唔上其他人气日牌拉面，不过价钱平成半，平平地过下口瘾都唔错。