唔係漢堡 (已結業)

最近信德开咗间饭团店，食到我上瘾，可惜系行得远，家阵烈日当空，可以行少步就行少步啦，咁啱苏杭街开咗间Not a Burger，卖韩式米汉堡，就睇下佢可唔可以一解我嘅cold turkey。店舖装修简单，冇枱，只要一张长枱几张櫈对住街外，开放式门面，夏天响度立食真系咩都溶，相信佢哋都系主打外卖，就系咁我就买咗三个冇包嘅包做晚餐。见住佢哋整，其实就系白饭加入韩国紫菜，麻油捞好，入模挤压成饼，加啲馅，再加另一块米堡就搅掂啦。火腿米堡 $22 - 韩国午餐肉，泡菜，吞拿鱼沙律。好味，泡菜同餐肉好夹，餐肉唔太咸，夹埋吞拿鱼沙律，湿湿哋，易入口。间唔钟食到粒腌萝卜，有啲汁，清爽。加埋米堡嘅麻油紫菜香，好完满。吞拿鱼汉堡米堡 $28 - 同上面果个差唔多，不过餐肉变汉堡肉。汉堡肉有少许猪臊味，有泡菜中和所以问题不大，如果有埋腌萝卜就仲好。吞拿鱼份量较少，总括系比餐肉米堡差。辣鸡扒米堡 $28 - 餐牌上标示辣度系第五级，似乎我都低估咗，佢真系够辣，不过唔会辣到食唔到。鸡肉唔算干，辣酱汁甜甜哋，几惹味。其实食落系似饭团，不过佢馅多啲，大个啲，廿几蚊个算系咁。男子汉食一个可能未必够饱，我就觉得啱啱好。