Steak Bar (已結業)

周二晚约咗靓女喺老兰跳开年舞，派对前就简单喺附近新开间「Steak Bar」度食晚餐。两层高嘅餐厅地下层楼底极高，用上嘅吊灯颇为时尚，气氛唔错。不过喺兰桂坊立足，相信最杀食就系有个酒吧。埋位后，除咗餐牌之外，好客嘅姐姐仔先送上两杯暖水。餐牌图文并茂，十分清晰。可能区内酒客大多为外国人，故点菜纸都有齐中英文版。吉列炸牛扒（$188）：二人各自都要咗客包有前菜、沙律、同白饭嘅「吉列炸牛扒」套餐。前菜为白滑幼嫩，清香惹味嘅冻麻酱豆腐。沙律清爽醒胃。大大碗白饭热辣辣、香喷喷，饭粒饱满之余，面层更舖满紫菜芝麻碎「振り挂け」，实滋味无穷！吉列炸牛扒连同烧炉上，食客边烧边食，确保入口时新鲜热辣。铁架上一、两成熟嘅厚身牛扒炸得十分金黄。烧炉上已摆有牛油喺面，贵客可慢慢续件将炸牛扒烧至八、九成熟。吉列炸牛扒香脆得黎极之松化，牛肉松软柔润且肉汁丰厚，可口味佳。鸡软骨饺子（$45）：饺子外表虽未及吉列炸牛扒般金黄，但入口即觉外皮巧薄，饺子由外脆到入心，点上甜甜嘅秘汁则加添惹味。「Steak Bar」兰桂坊新分店多咗个酒吧，环境明显比之前间面积阔落舒适。年轻嘅服务生友善好客，招牌吉列炸牛扒及鸡软骨饺子质高美味