陶園燒臘飯店 (已結業)

星期六同朋友去咗佐敦食晏倾嘢，大家倾到差唔多时间各自返归。佢住附近，我问佢有乜加𩠌推介。佢二话不说就话即系斩料啦哈😆，并且推介试吓「陶园烧腊饭店」。餐厅完全系街坊店，门面并唔起眼，亦无华丽嘅装修，不过就有热情嘅招呼。我其实只系喺门口望望，但老板娘已经出嚟睇吓我有乜需要👍。我要咗半斤叉烧同烧鹅下庄，望住师傅即场斩，保证唔会扣料，所以得两盒都好重手啊🤘🏼。烧鹅下庄($120)，屋企人好钟意食烧鹅🦢，我见挂出嚟都几靓，就买边鹅髀食食佢。烧鹅皮脆多汁，鹅肉又香又嫩，我老豆仲话一食入口就已经分到系鹅定鸭。下庄有髀食🍗，但就无胸肉，噒骨为主。我认为呢度嘅烧鹅烧烤香气特别强，好惹味啊。叉烧半斤($64)，我嗌咗瘦叉🐷，因为怕食肥膏，但打开盒后有啲后悔，因为见好似有啲干身。不过一食就觉得自己谂多咗，叉烧锁住肉汁，肉质软稔，甜度咸度适中，份量足。总括嚟讲，我哋成家都满意来自陶园嘅烧味🥢，小店出品绝对不比连锁店逊色，价钱亦好正路，难怪店内坐满堂食嘅客人！最后，我想讲门口只烧鹅公仔著咗衫好鬼搞笑啊🤣。