燒烤堂 (已搬遷) 新店位置

华生今日带我去果栏买水果，买完行返去旺角揾地方食嘢，行经长沙街见到有间串烧店，华生睇完门外餐牌就入咗去。店仔细细大约只有廿个位，可能啱啱先至开门，我哋系第一枱客。想食咩系点餐纸上面剔，今日我净系负责食。先来杯青柠梳打消暑解渴，冰凉梳打，加埋清香青柠，口味清新又醒胃。蒜蓉烧广岛蚝香喷喷热辣辣上枱，拎上来仲有吱吱声，小心烫手呀。广岛蚝肉肥嘟嘟，好似生蚝一样咁嫩滑多汁，肉质鲜甜，口感滑溜，加埋蒜蓉更加香。蒜蓉烧虎虾虎虾肉质结实弹牙，加入蒜蓉烧，鲜香惹味!泰式盐焗马友鱼鱼肚塞入香茅、辣椒、香叶等，然后用盐焗熟，香茅味四溢，鱼肉又香又滑，点泰式酱汁食更好味。麻辣蒜蓉茄子烧嘅火候啱啱好，软腍湿润，将茄子肉一丝一丝撕出嚟，捞埋麻辣嘅蒜蓉，十分惹味。手切鸡肾爽口又惹味，正！羊架烧得焦香，无膻味，入口软嫩多汁又美味。麻辣黑豚肉韮菜花串，烧韮菜花未食过，黑豚肉嘅油份滋润咗韮菜花，烧完都依然青绿嫩口，连埋焦香脆口嘅豚肉一齐食，好食。地道牛肉串无食，不作评论。冲绳黑糖烧菠萝香甜多汁嘅菠萝被略烧过，上面淋咗黑糖，变成脆脆，黑糖焦香加上菠萝嘅鲜甜，好食。又发掘到一间好味串烧。