桻之燒 (已結業)

朋友住鲗鱼涌，今日放工揾佢食饭，佢就带咗我来呢间餐厅食串烧。餐厅地理位置非常方便，地铁站出行5分钟左右就到达。环境不算十分宽敞，但坐得舒服。见到食评不少人点二人套餐，我哋两个都跟住叫。第一道菜系一口生蚝，混上番茄酱令生蚝更鲜味。个人十分喜爱呢道鸡泡鱼干，非常香口，不但烟烟韧韧，而且愈嚼愈香。虾多士好香脆，虾肉肥美，混上酸酸甜甜的酱汁以及蟹肉令人印象深刻。沙白清甜可口非常肥美，而且鲜味十足，朋友赞不绝口。花雕味欠奉，但鸡翼烧得唔错。牛小排配上番茄及葱令到整体感觉冇咁油腻，牛味浓郁，未至于入口即溶，但都几好食。烧芦笋吸引之处系外层香烧，但内里依然有水份唔会太干呢个意大利饭绝对系今晚嘅亮点，大啡菇水份十足，黑松露味浓郁，意大利饭硬度恰到好处，非常好食。大话七几好饮，但下次饮会叫少冰，因为饮饮下越嚟越淡。埋单$514，价钱合理。