北海道爐端燒 (已結業)

放工约朋友去尖沙咀饮嘢食宵夜吹下水。突然之间好想食日本烧蟹盖，揾到呢间系附近又未食过就一齐上去试下。唔好讲咁多即刻叫杯啤酒先，虽然佢得一款生啤，但价钱又几平。一杯细嘅都系$39，大杯到好似个头咁嘅都系$88！咁当然叫杯大嘅爽下啦。然后我哋就叫咗几个小食一边饮嘢倾计一边送吓酒。浜烧蟹盖&浜烧三色蟹盖虽然就唔系好似日本咁有个火炉自己烧，但都会见到火炉喺餐厅嘅一边烧紧自己嘅蟹盖，依然令人满心期待。蟹盖入面除咗蟹膏之外仲有满满嘅蟹肉同蛋黄。搅匀一齐食，蟹味大爆发！而且味道冇一般蟹盖嘅通病：太咸！呢度嘅蟹盖味道刚刚好。朋友嘅三色蟹盖都好靓仔，佢话加咗海胆之后味道更加鲜。牡丹虾刺身，肉质新鲜，味道甜美。饮酒又点会少得烧物呢，明太子牛油烧乌贼须，鱿鱼须够爽脆不靱，加咗明太子牛油去烧更加咸香。烧鸡软骨，烧够干身，做到好似炸出嚟咁香口，结果另外要叫多两串。呢间餐厅虽然地方唔大但坐得几舒服。每一种食物都有水准，嘢饮价钱合理，不失为同朋友饮嘢倾计食嘢嘅好地方。