炑八韓烤 (彩明商場) (已結業)

年头开嘅食肆年尾先嚟食皆因觉得烤肉份量少，系咁追加肉类会好贵次次都话食晏去最后都系讲完就算，今次终于都嚟到喇。餐厅几大，座位舒适，卡座多，无咩油烟味，不过午巿多数食客都系拣定食多，附近枱烤肉都会闻到香味。我哋叫咗两个定食一份自选烧烤餐，觉得烤肉比定食味道好，虽然肉嘅质素唔系话惊喜但都可以，而服务方面都唔错，整体几好。午巿定食或烧烤餐都会有韩式清汤，芽菜，泡菜各一份，汤清得嚟都唔错，芽菜亦好夹口，泡菜可以配定食，两款定食味道都比连清淡。石头蟹膏饭，睇落好足料但无咩蟹鲜味，有啲似炒饭，有少少饭焦。牛骨清汤粉丝，都系好清淡，职员都有话味道较淡，加少少泡菜提味，牛骨连肉都松软，清清哋都唔错。自选烧烤餐：炑八A骨牛扒+黑毛猪五花肉+特制护心肉，另外配有三款前菜，其中一款前菜海带几好味。牛扒有啲似牛仔骨，五花肉同护心肉都可以，无特别。配酱料加菜好味好多，另外炉边蛋无限添加，蛋好滑。+$25追加迷你烤牛肉流心蛋饭，都系唔重味，不过流心蛋加少少味已经好味，牛肉嘅量都几多。饮品+$8:冻奶茶。蓝天使梳打。柚子冷泡乌龙茶，呢杯几好，有乌龙香味又有柚子茶甜味。