樂天客棧 (已結業)

呢间新派中菜开咗一段日子，但从来都冇帮衬过，于是细佬就趁父亲节提议去试。味道中规中矩，唔算有惊喜，听落好特色嘅菜式，例如咖啡鸡，食落其实同想像中差不多，但貌似最普通嘅红烧素豆腐竟然超好味，虽然豆腐豆味唔够浓，但口感超滑，个金银蛋菠菜都好食，连汤都可以饮。个三杯鸵鸟肉煲偏甜，我冇写错，真系有甜味嘅，细佬话吊味嘅九层塔好食过啲肉㖞！个药材汤好正路，当归味唔太劲，甘甘哋，几好饮，但好油！因为只鸡冇剥皮，但热饮，撇一撇油后饮其实ok的。酥炸淮山粉有啲厚，个香酥南乳五花肉我觉得唔好食，好热气，但屋企人觉得ok，反而个炸海鲜油条几好味。