花園餐廳 (已結業)

訂咗飛係百老匯睇戲，重有成個鐘，於是乎過花園餐廳食飯。落旺角無數次，都係第一次去旺角哩間花園餐廳。花園餐廳原來有三層，地下只係入口，其實佢地最出名係鋸扒，我都係入到去先知，因為一直唔多留意花園餐廳，唔好怪我細路仔唔識世界。點咗一客紐西蘭西冷牛扒，一客紐西蘭羊仔扒，牛扒要7成熟，羊仔扒8成熟。餐湯羅宋湯同粟米忌廉湯各一客，聽聞正宗羅宋湯入面有少少牛腩同有少少辣，哩碗羅宋湯當然無牛腩，不過好彩湯唔辣，啱我口味啦。粟米忌廉湯如果加倍濃郁更理想。兩個扒上枱，塊鐵板夠熱，芡汁淋上去時即時聽到鋸扒最美妙嘅咋咋聲，煙霧馬上上升。牛扒點7成，結果黎到係五成熟，羊仔扒8成，上枱果d得六成熟，牛扒點黑椒汁羊仔架點蒜蓉汁。由於我比較中意食熟少少嘅牛扒，得五成，生咗d，只得六成熟羊仔架口感比牛扒差，騷味亦比較重，相信8成熟更啱自己口味。做人永遠格離飯香d，見到格離枱份牛扒，份量好大喎！夠鐘入場睇戲！