牛極 (大全街) (已結業)

继续一支公嘅晚餐。今日有事务要处理，去开大角咀𠮶头，赶时间又肚饿，见到呢度有牛极就入去快手食个饭。呢间分店嘅门口好特别，系一个红色大鸟居。牛极间间分店都一样，烧肉拣好，喺自助售卖机落单俾钱之后就自己揾位坐低。之后等烧肉上枱期间，可以去自助沙律吧攞沙律食，仲有热汤同白饭，全部任食。餐具同水自己攞。所以系冇收服务费嘅。呢排成日出街食，等我平平哋叫块最细块嘅牛肩排算数。牛肩排 180g $80烧肉好快就送上，快靓正。虽然唔贵，但系块排都唔欺场，几厚身上面又放左啲黄姜丝。切开就见到入面未熟，自己切做自己入口嘅大细，再喺块热石板上面烤几烤就好快食得，要快手，如果唔系外围会太熟。质素保持一贯水准，都算嫩嘅。今次落左枱上供应嘅烧烤牛排调味料，味道更好。围裙都系自助自己攞，一定要攞，因为d汁弹到周围都系。沙律系例牌嘅生菜，仲有车厘茄同粟米粒。汤都系例牌嘅日式牛肉汤，我食唔到牛肉，不过有红萝卜同白萝卜。肉汁有三款，分别系自家制烧肉汁，蒜蓉同辛味芥末烧汁。