韓正屋韓國料理 (搵食市集) (已結業)

又去揾食市集揾食，今日先发觉原来呢个市集有两层，楼上仲有火锅等等嘅美食，往后可以慢慢逐间试。上次猴子试咗日式便当，今次就试吓韩国食品，喺韩正屋叫咗个韩式牛肉便当（加HK$3有汽水）。一个红色餐盒，分别载住牛肉、渍物、泡菜同白饭，摆放得整整齐齐，观感唔错。牛肉嘅份量相当足够，成座小山丘咁，虽然里面有啲菠菜，不过系调味必需嘅，唔系要嚟垫底呃秤。牛肉食起上嚟肉汁够，唔会干噌噌，而且味道浓郁最啱𩠌饭。渍物方面就冇预期中咁爽脆，尤其系芽菜，比较腍咗啲，不过味道系OK嘅，只系欠啲口感。泡菜方面，唔太辣，捞少少落啲饭度就可以更加开胃。白饭软硬适中，亦系值得一赞。