幸運小食 (已搬遷) 新店位置

长亨大装修后，原本喺街市内伯伯𠮶档幸运小食搬咗上商场地面7仔隔离劲方便。舖仔细细一眼望晒只可外卖，仲好啦，舖细租平d，自然食物价钱就可以平d。今日放假想食伯伯嘅粟米汁扒意，但去到见到唔少街坊陆续都买车仔面(记得之前喺OpenRice 有人写过食评车仔面好得) 好就试吓食评话高质嘅牛腩啦。要车仔面自己攞餐牌红笔highlight落单，我要咗瑶柱牛腩根、萝卜、鸡翼尖、米粉，等咗一阵间行完759再返嚟拎返屋企食。😄一开盖牛腩汁香气浓郁，我要米粉想挂汤d。个牛腩汁汤好浓，可能系有牛筋一齐煲所以有张力，唔会好似一般车仔面汤咁淡似水。😋牛腩、牛筋都好入味，萝卜就炆得唔够色仲系白色但冇渣嘅，鸡翼尖肉质够林但系卤水汁唔够入味总算好食嘅。唯一比较差系个米粉成碗要用匙羹食，成碗米粉都系米粉碎，好似剪俾bb食咁☹️用筷子系完全夹唔起。另外，疫情下多咗人买外卖，我等嘅时候见到有一对年长夫妇自携食物盒嚟买小食做𩠌，我觉得都几好吖，大家多啲帮衬小店，帮衬伯伯，支持下街坊小食💪