八王子拉麵館 (已搬遷) 新店位置

大早之前团购咗八王子，一直未有时间去食，就黎到期，所以上星期日就去食。买咗3张，一家人去食，怕多人，1245就去到，店很细，幸好仲有位。之前都食过一次，不过印象质素只系一般，如非有团购，绝对唔会再帮衬。我同妈要咗八王子拉面，爸就要咗味噌拉面。再加多个清酒煮蚬同炸鸡软骨。先讲呢两个小食。个清酒煮蚬d蚬劲细只，系超市d雪藏白蚬。配以大豆芽。清酒味好劲，好苦，不过味道入唔到蚬同大豆芽度。炸鸡软骨，睇个卖相就知唔得，劲油，反晒光。炸得唔够脆，好肥腻。八王子拉面系牛骨汤底，个汤底肥到无人有，成1cm厚嘅油浮呀浮...真系睇见都觉肥。如果肥得黎系香，咁都唔怕食，但个汤底除咗肥油味之外，就无咩特别嘅香味，好淡。拉面面质一般，唔算弹牙，平平已矣。不过𠮶两块「叉烧」就值得一赞，𠮶两块「叉烧」应该系猪肉，似猪颈肉。有暗暗嘅油花，最主要系外皮烧过，所以好香，好系bbq完嘅香味。环境太细，有点迫；服务不过不失。