新麻蒲 BBQ (波斯富街) (已結業)

韩式lunch set/ dinner set 偶然会食， 但韩式烧肉真系好少， 今日终于同屋企人嚟食下韩烧牛肉， 新麻浦地点方便，一出地铁站上楼上已经到啦， 可以开开心心坐低食好嘢了。虽然话呢个系二人套餐，但份量一啲都唔少， 足足放满三层， 最下𠮶两层系一大大旧嘅牛件， 最上就有啲蔬菜同海鲜， 啱晒唔同人口味。好肚饿，急不及待开炉烧肉啦~~ 几喜欢餐厅提供烧烤网， 等烧出嚟嘅又可以流走， 使牛肉烧得更香脆，唔会太油淋淋。咁多款牛之中，最爱霜降牛肉即系上图第二层距离镜头较远𠮶款， 脂肪分布均匀， 50 50简直系黄金比例， 少出嚟边位香脆，内里肉质嫩滑，渗出阵阵牛香， 牛脂入口即溶， 冬天暖笠笠入口一定更有滋味！食完咁多肉，当然要食番啲菜补充下膳食纤维啦， 呢个套餐好在有沙律同韩式配菜附送👍👍呢个沙津虽然外表平凡， 但配上柚子蜜酱，味道清新怡人， 令人胃口大开。呢个部队锅都几丰富㗎， 有齐部队锅必要食材。地点方便，食物又高质，得闲同屋企人或者朋友行过不妨试下！