穌棧 (已結業)

工人寻晚冇煮我饭，所以今日出街食晏。后来经过船街𠮶间Cafe y Taberna就入去试下。餐厅大概有不足二十个位，但12：15左右除咗一张被订嘅枱外，其他枱全部满座。午餐以set lunch为主，今日有海南鸡饭、冬荫功、泰式叉烧饭、青咖喱鸡、猪手㷛同埋鲜虾炒金边粉。套餐包一杯泰式饮品或㗎啡、茶。价钱由$48至$58不等。我叫咗鲜虾炒金边粉同埋香茅特饮。等咗唔到十分钟就上菜。份量唔算大，都有五、六只中虾，咬落好爽口。金边粉亦炒得干爽，唔会一pat pat；另外啲粉吸咗个酱汁，都几好味。响香港唔系每间泰国餐厅都有香茅特饮。呢间都OK，但如果可以再浓啲同埋少甜就更好。因为唔系咩大餐厅，所以唔会expect有啲咩酒店级服务。但我比较欣赏呢间餐厅系就算佢系一间小餐厅，都唔会为咗做多轮生意就催你埋单。一般食客亦好识做，食完就走。今日餐饭盛惠$54。返到公司同同事提起呢餐饭，佢话海南鸡饭同埋㗎啡（另加$6）系佢嘅至爱。如果有机会我会再帮衬，试下佢嘅海南鸡饭。