篤篤車 (已搬遷) 新店位置

今日喺元朗试试另一间车仔面，位置喺马田路旧B仔对面。入到去店员殷勤地招呼就座，就座后望一望Menu，见到有唔同汤底选择，分别有泰国鳄鱼汤、冬荫公汤、牛腩汤、咖喱汤及清汤，而辣度亦有分。鳄鱼汤底车仔面真系未试过，咁今次即管试试。我哋叫咗两碗油面，𩠌方面第一碗叫咗猪肠、冬菇、萝卜、猪红同炸鱼蛋，另一碗就有金钱肚牛腩同芝士丸。另外加多一客炸鸡翼及两杯薄荷青柠梳打。食物大概等咗8分钟就到，未放底已经闻到浓浓汤底香味，一放底时已急不及待要试一试个汤。个鳄鱼汤好浓，配上杞子甜甜地。跟住就要试下个面，面底渌得几腍，食落几爽口㗎！啲𩠌方面，个金钱肚做得好入味，咬落一啲都唔靭，另外鱼蛋同冬菇都几弹牙㖞！其次牛腩方面，个人喜欢呢个食法，因好似食紧牛肉干咁。猪红猪肠亦系一个唔错选择，因为食得出新鲜。泰酥炸鸡翼炸得恰到好处，皮脆而内𥚃够热，再点点个甜酸酱，可以话系完美组合。最后杯薄荷青柠梳打真可推介一下，全因杯内有唔少嘅薄荷叶，薄荷叶嘅味道亦将青柠梳打嘅味道带出来。笃笃车无论食物与饮品都有一定嘅水准，呢间车仔面小店一定会再去帮衬~