Burger Joys (第一街)

营业中

休息中

成日食麦记都食到好闷，今日试吓新野，去咗西营盘呢间Burger Joys，地方都几隐蔽，要喺横街落楼梯，揾咗一阵先见到。骤眼睇价钱好似偏高，但系其实个餐分量十足，绝对值回票价。首先要讲吓饮品，因为真系太惊喜。本身唔系特别钟意饮汽水，谂住如果系樽装水会好唔抵，点知佢哋俾咗支斐济水我哋。然后嚟咗沙律，虽然系跟餐嘅，但系都唔马虎，有番茄有青瓜，酸酸地嘅酱汁，非常开胃。朋友叫咗芝士牛肉汉堡，一睇就知同平时麦记好唔同。除咗牛肉明显地厚身之外，包亦都比较松软，唔会好干，当然牛肉味亦都非常浓厚啦。薯条方面，简直可以用出色嚟形容。虽然外型同麦记相似，但系比较硬身，食落去比较脆比较香口，同时亦都咸度适中，原本拣咗沙律嘅朋友都食到停唔到口。我自己就叫咗个杂菌蘑菇汉堡，本来想像系烤大啡菇，但其实佢哋系用炸嘅，但系感觉都好新鲜，炸菇好juicy，亦都唔觉得油腻。最后叫咗个水牛鸡翼，酸酸辣辣咁，虽然好食但系有少少重口味，好彩有西芹同甘笋做配菜平衡返。