HOLA

营业中

休息中

养狗后，已经帮衬过Hola好几次。呢度地方算大，室内、外有唔少座位，就算系周六，嚟到都唔系好需要等位，咁样带住狗狗就比较方便啦~ 最近几次嚟，我先知道原来狗狗可以入餐厅里面坐，所以天气热时，狗狗都可以叹下冷气。呢度食物水准唔错，嘢饮亦比较特别，加上价钱公道，所以我都几钟意嚟呢度食嘢。一个平日的中午，趁放假又同狗狗过嚟。虽然平日有特价午餐，但因为自己食素，所以最后就从餐牌点食物，拣咗素食全日早餐同埋一杯青瓜梳打(应该仲有青苹果)。素食全日早餐好丰富，有炒蛋、大啡菇、蘑菇、蕃茄、粟米、沙律菜、茄汁豆，加埋一个香脆的迷你牛角酥！炒蛋几滑，一碟有2种菇，令人满足。碟上的食物本身唔需要太多调味，所以感觉好健康，而最好当然系我可以喂少少俾非常为食的狗狗啦！青瓜梳打好好味，又解渴。由侍应送上嚟时卖相一流，所以我见另一台的单车客都望到实。以前我试过呢度其他口味的梳打，不过自己偏好清新啲，所以呢杯梳打甜甜哋又有青瓜味，好合心意。一个平日，可以hea住同狗狗食晏，感觉满足，而我相信狗狗都系咁谂既，因为每次带佢嚟到天空之城，只要行经Hola，佢就一枝箭咁标入餐厅架喇。