華輝餐廳 (已結業)

苹果批同鸡批以外，仲有其他选择。如果喺劲肚饿下嚟食饭，首选呢个集合咗餐汤、炸春卷、方包、葡国鸡饭同奶茶的猛男饭。份量大，碟饭不论𩠌、汁同白饭都多到涌出嚟咁。食过一次后，发现一个人系食唔晒成个餐，改叫少饭同走汤就啱啱好。葡国鸡饭的椰味唔重，汁头轻身得嚟冇水汪汪，入口唔觉饱滞感；鸡肉冇雪味，件头多；有薯仔同少量杂菜制造靓视效；饭软硬适中。成碟饭热辣辣，食落多两分好味。春卷虽然系普通货式，但炸得够脆，入口唔系冻冰冰。脆口嘢配埋碟头饭，成个餐丰富晒。下午茶餐干炒肉丝米粉系细份量，谂住茶餐当午餐恐怕会唔够饱。佢细碟得嚟用料算多，肉丝唔系得几条，碟粉炒得有镬气，好香兼少油，味道就淡咗少少咁啰。无辣不欢者，混辣酱食就变相加盐调味。要注意返，辣酱够晒辣，加料前先试试味比较稳阵。