古早牛肉麵 (已結業)

去深水埗买完嘢行过见到间台湾嘢有面线食，感觉香港嘅台式餐厅有好多但有面线食嘅好似唔多，见好耐无食过面线就入咗去食。睇餐厅店名以为系食牛肉都为主，睇完餐牌先知饮品选择更多，比起台式外卖饮品店都唔输蚀。七点入座几乎座无虚席，我发现好几枱客同我一样都系自己嚟食，可能呢间餐厅系独食之选综合面线（卤猪大肠+蚵仔）面线卖相同系台湾食到嘅差唔多，味道浓淡都适中，面线软滑，入口即化。肥美蚵仔入口即溶，味道鲜甜唔腥。卤猪大肠十分肥美，系睇得出嘅邪恶感，卤水入味，入口即溶，整体都好食。冬瓜茶加爱玉我点咗少冰微糖，冬瓜茶味道清新解渴，夏天可消暑褪闷热。爱玉份量十足，几乎整杯都系爱玉，只系加4蚊就有好抵，爱玉入口爽滑弹牙，味道清爽，单点一杯行街饮都正。宜兰迷你葱肉馅饼食完面线觉得唔够喉，见隔离枱点嘅馅饼外皮煎到底面金黄色卖相相当吸引，于是我又点份嚟食下。馅饼外皮脆得嚟有啲烟韧，外皮香口，口感味道都似煎饺。馅料饱满内馅充满肉汁，当咬开外皮时里面嘅肉汁会爆发出嚟，肉汁有葱同高丽菜嘅甜味同肉馅嘅香味，即使饼皮煎到香脆肉汁可以补充返水份，令到馅饼食落唔dry，整体唔错。