微辣大排檔 (已結業)

朋友问我识唔识微辣，我就反过来介绍佢微辣大排档。呢度嘅装修花咗唔少心思，唔同区域有唔同嘅布置，主题都系环绕住澳门，嚟一转就当自己冲出咗香港。餐具都甚有特色，茶壶够晒正。首先拣个小食，怀旧蟹膏虾多士热辣辣又新鲜，虾胶好弹牙，面包又唔会太油腻。最正嘅就系配埋混有蟹籽嘅蟹膏，令虾多士更加香口。金沙椒盐鱿鱼份量劲多，而每片鱿鱼就比较薄身，食起上嚟更有口感。米酒鸡上枱时仲有只凶神恶煞嘅鸡喺度怒啤住我。入面原来系用荷叶包住嘅原只鸡，店员会即场淋上燃点中嘅米酒，真系色香味俱全。虽然店员放咗铰剪喺枱上，但其实铰剪只系用嚟剪开荷叶，而入面嘅鸡肉嫩滑得完全可以一夹即起。原只鸡入面仲酿入云耳，入晒味好好食。发记大香肠系原条大香肠吊起嚟卖，然后店员就会帮我哋一一剪开。大肠顿时变成小肠，味道有啲似台式肠，甜甜地几好味。椒丝腐乳通菜正常水准，腐乳味够香，最紧要就系份量够晒多，啱晒最钟意营养均衡嘅我。