蘭州拉麵店 (已結業)

好少见有拉面店系现场即拉即煮，可以落咗单睇住佢即拉即煮你碗面，以前见过北京楼有师傅出嚟做拉面表现，不过都似系为游客表现为主。佢哋亦有即削嘅刀削面。面拉得好弹好烟韧如果可以再拉多一两次等啲面再幼身啲就仲理想。加麻辣要加3蚊但系我每次都加，其实佢个麻辣都唔算系麻，就系俾一小碟辣椒油加蒜蓉等你自已加，我每次都会落晒啲蒜蓉，辣椒油就加大半左右慢慢调较，因为我好钟意食辣但系又食唔到非常辣。个汤底味道好香好浓但系就咸咗少少，我会先饮两啖汤试真啲味至加辣椒油同蒜蓉。我碗面仲加咗五香牛肉同猪肚，佢哋嘅五香牛肉即系台湾牛肉面𠮶种牛肉，真系做得好好，又香味道又刚好，肉质嫩得嚟又有𡁻口亦唔会起丝黐牙。猪肚切成丝咁，太幼食唔出味道，如果切番厚身啲我觉得会唔错。总体味道真系唔错，好啱我口味，如果唔系怕佢咸，我会连汤都饮晒！