蘇三茶室 (已結業)

听讲【苏三茶室】老板，曾经喺饮食男女做，即系由一位写食评嘅人，去开一间食肆，理论上应该无敌啦挂！理论上系咁，但实际又系点？最好就去试试！事先订咗只低温焗柑桔酒鸡同海鲜煲，其他就即场Order，前菜系烟熏猪手沙律，朋友话猪手咁肥！跟住讲咗一轮胆固醇如何健康嘅论文，好似严浩上身咁，几乎要现场表演食亚麻子咁滞！点知碟烟熏猪手沙律一嚟到，佢就放晒心，而我就冇晒心机……得果三四片熏蹄状嘅物体铺喺菜上面，喺我楼下叫碟熏蹄饭，起码多佢一倍，而值钱亦都平佢一倍！跟住嚟香草焗鱿鱼，韧！唔香！海鲜汁煮蚬，细只！唔滑！咖哩牛肉饼，干！清真牛肉饼比佢好食一倍！海鲜煲，卖相似厨余，味道亦一般！最后嚟只鸡，最似样就系呢个，嫩滑得嚟又有阵阵香味！食完之后得出一个结论，食评人开食肆，同影评人拍戏一样，都未必信得过！