新興小菜火鍋

营业中

休息中

亲戚到访，老爸有命安排外出晚餐，一时间谂唔到去边度食，表叔即话去观塘街市新兴小菜开餐，唔切反应老爸已经话好提议，事后才知佢两老表系观塘返工，经常帮趁。大排档系街市楼上，虽然无豪华装修，但坐得舒服仲有冷气。坐低听到厨房个炉头猛火声，镬气十足，睇墙上菜牌，菜式唔少得过酒楼。老爸同表叔唔知几时闪，原来去左楼下街市买海鲜，再见人就拎住一条东星三只花蟹，仲话加工费好平。佢两老咁熟地头，当然由佢发办，先有沙姜冻猪手，除自来东星班、花蟹清蒸之外，其余有黄金虾、椒盐鲜鱿、鼓油王炒面、豉椒鹅肠、金银蛋苋菜，连红酒啤酒，六个人饮饱食醉埋单都唔过千，低食!沙姜冻猪手猪手爽口弹牙绝不肥腻，入口有酒香，铺在猪手上面的是新鲜沙碎，非普通白切鸡姜蓉。椒盐鲜鱿鲜味、弹牙，脆浆薄兼松脆，椒盐够辣够惹味。黄金虾海中虾炸得够脆口，咸蛋黄够干身，虾肉仍保持鲜嫩，吃下外脆肉爽又美味。鼓油王炒面够镬气，好少会食到咁少油干身，好食！