花見月 (已結業)

一直听闻科学园环境唔错，有得玩有得食，于是即管去睇下。6点几见肚饿，选咗呢间日式餐厅，环境整洁，全落地玻璃好吸引我。睇餐牌好多嘢都想试，于是点咗照烧澳洲牛扒定食、烧牛舌串、紫菜芝士年糕、67度温泉蛋鸡肉凯萨沙律、花见月特上鱼生定食和苦瓜海葡萄沙律：照烧澳洲牛扒定食选料好正，牛扒煎得刚刚好，入面少少粉红色好嫰唔会干。牛舌软硬刚刚好，配上黑椒碎超惹味。紫菜芝士年糕好得意，啲芝士味好浓，咬时要小心，流心架，会唧出嚟。67度温泉蛋鸡肉凯萨沙律，只温泉蛋入口好浓蛋味，半流心感觉质感好丰厚，鸡扒加上好多菜丝，份量劲大，一上菜就心谂死啦，今次实食唔晒。花见月特上鱼生定食啲鱼生好靓，有金枪鱼腩，三文鱼子，海胆，吞拿鱼腩蓉，蟹肉，有只大虾，蟹柳，玉子，金枪鱼腩入口好滑，淡淡油香，其他用料都好正好鲜味，海胆都好多，绝对物超所值。最后一味苦瓜海葡萄沙律属于清新类，苦瓜微甘，海葡萄偏咸，配上口味清淡嘅菜丝同沙律醋，几种味道调和得刚刚好。望住窗外风景一路慢慢食，绝对系非常写意嘅选择。