好彩海鮮酒家

营业中

休息中

喺假日嘅下午一家人想揾个地方叹茶，拣咗九龙城广场间好彩，因为知道餐厅坐得比较宽敞，可以坐得耐少少。我地大概1点半到达，等咗几分钟就可以入座啦，今次等位人数相对平日少。三个人点咗8碟点心，啱啱好食得晒，又唔会太饱或者肚饿。咁多点心入面比较钟意萝卜糕。萝卜糕一共有四件，每一件唔算好大嚿。 萝卜糕唔算太油腻，而且唔会一夹起就成嚿散晒。另外叫咗粉果，一共有三件。虽然馅料充足，但系一夹起个皮就散咗，搞到啲馅跌晒出嚟，非常狼狈。叉烧包嘅水准都ok。如果要食得饱嘅，可以点呢一类包类嘅点心。另外点咗个比较特别啲嘅薄撑，煎得非常薄，睇得出师傅用过心机去煮。唔会太咸或者甜，亦都唔会太油腻。切食六份左右，值得一试。最后点咗一碗粥，大概系两个人嘅份量。粥嘅味道可以接受，但系馅料好似唔系好多，下次可能会改叫皮蛋瘦肉粥。今次饮茶以桂花糕作为甜品。桂花糕嘅味道好香，女士们就最钟意食。酒楼环境够宽敞宁静，食物质素都合格，最唔好嘅就系啲职员质素真系好麻麻，个个都黑口黑面，少咁啲笑容真系会影响食客嘅心情。