Green Orange

今日去咗上环嘅 Green Orange 食晚餐，因为系楼上餐厅嘅关系，环境都几清幽。食嘢之前叫咗两杯嘢饮，我个杯Sin City系威士忌同咖啡嘅Cocktail，一睇落去仲以为系咖啡，饮落去咖啡味浓，第一啖有啲似 cold brew，之后会渗出淡淡嘅威士忌味，因为用咗Laphroaig Whisky，有相对地重嘅泥煤味，令到味道层次非常特别，钟意威士忌嘅朋友值得一试。朋友就叫咗杯Ba-La-Bloom，味道偏甜，闻落去好香玫瑰味。前菜我哋叫咗忌廉白酒煮青口，青口鲜甜，配合淡淡嘅忌廉汁，非常适合倾住计食。我哋仲叫咗烧北海道带子藜麦沙律伴柚子橙香醋汁，颜色鲜艳，望落去非常吸引，而且好香煎带子味，配合生果同埋沙律，食落既开胃又健康。主菜有西班牙红虾海鲜浓汁阔条面，西班牙红虾之外有青口、带子等海鲜，材料丰富，而且有蘑菇、萝卜同蕃茄做配菜，煮得入味得来又有鲜味。再嚟系烧西班牙黑毛猪架，油脂分布均匀，而且肥瘦适中，令到猪架嘅口感有啲似猪颈肉，油份充足又有焦香味。最后系火焰香蕉雪糕做甜品，上菜嘅时候侍应会加上火酒令到成个甜品着晒火，非常霸气。烧完之后仲会有少少余温，同雪糕形成强烈对比。