木槿花韓牛專門店 (已結業)

餐厅分上、下两层，上层正门就喺士丹顿街，下层有另一个门口就比较难揾。装修简洁，冇繁复装饰，始终烧肉大油烟，越简洁越干净。先嚟前菜开开胃，有三小碟，分别系菠菜、芽菜同泡菜。汤只有一片萝白同一块牛粒，好多油，但味道唔错。提供生菜、蒜粒、盐、韩国酱汁（唔辣，味道有啲似豆瓣酱）任意配搭。用生菜包住嚟食可以减低油腻感，又可以均衡饮食啦~喺韩牛专门店，主角梗系韩牛啦，点可以唔叫呢？韩牛出名系牛味香浓厚重，烧到六、七成熟就最好喇！左至右系：封门柳、腹胁两侧肉、腩包肉，排列整齐。封门柳每只牛只有两条，所以一般喺街外系好难买到，识食就一定要试，正野嚟架喂~ 总共有八片，仲要系厚切。油花唔算多，但肉味最浓最重。腹胁两侧肉雪花纹理肉平均分布。肉质纤维较粗，所以会薄切，入口富咬劲，都唔错。腩包肉切到一条条长条，睇啲油花已经知油脂非常丰富，真系咇晒啲牛油出嚟，入口甘香松化，好软腍又香滑。配埋白饭，够热够大碗，好满足！饮品可以单罐叫，又可以$40/位 任饮，细细罐，可以叫多几款唔同饮品试吓。最后要赞吓服务好贴心，店员会问客人要唔要围裙，又会细心讲解点烧最好，仲会帮手烧埋。