蜀府川鍋 (已結業)

今晚约咗男朋友同佢屋企人去油塘嘅蜀府川锅食海鲜，由油塘站行过去非常之方便，出左巴士站过对面马路就系。一入门口就有中鱼缸，入面既海鲜好生猛啊！餐厅装修好似旧式茶楼，有卡位亦有大圆枱，可惜卡位灯光较暗，枱比较细，四个人坐大圆枱较适合。我哋一行四人叫咗一个六人海鲜餐，另加一份海胆。由于海鲜系即叫即㓥，上菜时间都偏长。我地叫左份小龙包打底，皮虽厚但多汁。好快侍应就送上甜品：手工芝麻绿茶芋茸饼。呢个饼比我想像大好食，香脆不油腻，中间夹心软糯，绿茶味唔会太甜。苦苦等候，终于等到侍应端上蒸气锅。侍应建议我地可以先半蒸半烚虫草花蒸鸡，但我地冇听，因为蒸鸡好食几百倍，超滑，烚就浪费了。经我地多翻催促，海鲜终于登场啦！海鲜盘令我地精神抖擞，皆因佢地全球都好生猛啊！龙虾已开边，但佢地既触须全部识郁，每只都比手掌大，厨房已将龙虾钳扑碎，方便食客享用，好贴心～有一只龙虾仲有满满既虾膏！九头活鲍鱼真系不得了，每只都已经清洗干净，我地一掂佢地就会收缩，证明每只都系活生生。蒸完之后，好易就离壳，而肉质弹牙爽口，唔需要蘸调味料都鲜甜。沙巴龙趸切片，薄薄地一碌就熟，好滑。贝壳类最出色就系大蚬皇，预先加左蒜蓉去蒸，啖啖肉。