影片
更多
2024-09-18
78 浏览
Eagle & Sparrow Music Cafe📍佐敦文蔚街23号地舖家姐嘅朋友因健康问题，必须控制饮食，因为外食高糖高油，令佢出街食饭嘅机会大大减少，加上香港提供素食、生酮菜单嘅餐厅买少见少，所以每次约佢食饭前我都会做下功课，尽量拣一间适合佢饮食需要，又啱我胃口嘅餐厅。9月尾就到佢生日，我做好research，拣咗一间主打透过音乐同素食连系社会各界嘅餐厅，希望为佢带嚟一个开心满意嘅晚上。我同餐厅约好时间，安排好星期四晚上7点后入座，当晚有驻场歌手Derek为食客带嚟一首又一首经典金曲，令在场所有人都陶醉万分。好开心见到唔少年长食客主动同Derek高歌一曲，将气氛带到最高峰！有时开心就系咁简单，小小嘅场地，虽无华丽嘅装修，但简约嘅摆设同随性嘅装潢、亲切和譪嘅店员，足已令人留下深刻印象。喺呢度想多谢店员们友善嘅招待、Derek对演出嘅热诚、所有食客们嘅投入，种种加埋令我同家姐朋友能好好享受呢晚嘅时光。 💰$120 素蟹宝宝 🍔家姐朋友唔能够食太多carbs，庆幸餐厅有提供转生菜包嘅选项，可以唔洗「走包」。我呢个大乡里都系第一次见到生菜汉堡包，估唔到卖相都唔输蚀，而且伴有用原个薯仔新鲜
📍佐敦文蔚街23号地舖
家姐嘅朋友因健康问题，必须控制饮食，因为外食高糖高油，令佢出街食饭嘅机会大大减少，加上香港提供素食、生酮菜单嘅餐厅买少见少，所以每次约佢食饭前我都会做下功课，尽量拣一间适合佢饮食需要，又啱我胃口嘅餐厅。
9月尾就到佢生日，我做好research，拣咗一间主打透过音乐同素食连系社会各界嘅餐厅，希望为佢带嚟一个开心满意嘅晚上。
我同餐厅约好时间，安排好星期四晚上7点后入座，当晚有驻场歌手Derek为食客带嚟一首又一首经典金曲，令在场所有人都陶醉万分。好开心见到唔少年长食客主动同Derek高歌一曲，将气氛带到最高峰！有时开心就系咁简单，小小嘅场地，虽无华丽嘅装修，但简约嘅摆设同随性嘅装潢、亲切和譪嘅店员，足已令人留下深刻印象。
喺呢度想多谢店员们友善嘅招待、Derek对演出嘅热诚、所有食客们嘅投入，种种加埋令我同家姐朋友能好好享受呢晚嘅时光。
[价钱 Price]
💰$120
素蟹宝宝 🍔
家姐朋友唔能够食太多carbs，庆幸餐厅有提供转生菜包嘅选项，可以唔洗「走包」。我呢个大乡里都系第一次见到生菜汉堡包，估唔到卖相都唔输蚀，而且伴有用原个薯仔新鲜制成嘅薯条，唔会炸到过晒龙，咬落去爽爽哋，食到薯仔原有嘅甜味，调味适中自然，非常好食。
我特别钟意炸素蟹饼，即使用全素材料，都可以还原到蟹肉饼嘅口感同味道，非常惊艳！如果唔想食生菜包，都可以选择酸种包，相信一定都好好味。
[价钱 Price]
💰$78
乌卒卒 (杂菌黑松露忌廉意粉) 🍝
我就拣咗黑松露忌廉意粉自己食，真系不得不佩服厨师嘅调味，我完全唔觉得自己食紧素食意粉，因为杂菌同洋葱味道浓香，忌廉亦唔会过量，加上芝士粉同迷迭香等等嘅香料调味后，我敢讲完胜多间意粉专门店！
[价钱 Price]
💰$58
巴斯克焦香芝士蛋糕 🍰
甜品方面，我拣咗最爱嘅巴斯克芝士蛋糕，除咗原味芝士口味外，仲有朱古力、咖啡同抹茶口味选择。蛋糕芝味十足，表层口感焦脆，内层软绵细密，而且坚持自家制，性价比非常高。
[价钱 Price]
💰$88
生酮纯素朱古力挞 🍫
不得不大推一下呢度嘅招牌甜品，生酮纯素朱古力挞！话明系生酮，当然无用到面粉去整啦，以almond flour整成嘅挞皮唔似一般甜品咁肥腻，但亦唔怕十分松散，硬度适中，朱古力馅超级香浓，再喺挞面上洒上果仁片，增加口感同层次，家姐朋友表示为满分之作！
[价钱 Price]
💰$45
蓝精灵 (蝶豆花) ☕️
至于饮品，我拣咗一杯非常特别嘅碟豆花latte，湛蓝色嘅饮品配上简单拉花相当精美，以干蝶豆花围边装饰更显优雅。味道出奇地香甜，有少少似云呢拿，口感细滑，值得一试。
[价钱 Price]
💰$68
绿油油奶昔 🥑
家姐朋友拣咗唔落雪糕打出嚟嘅牛油果奶昔，可以见到色泽翠绿，重泡沫感，能完全带出牛油果嘅香气，而且可以选择改用燕麦奶冲制，vegan-friendly！
张贴
