Mana Thai Kitchen (已結業)

今日约咗朋友食饭，朋友喺湾仔返工，所以就提议直接喺湾仔晚饭，朋友话佢同事试过呢间泰国餐厅好好味 所以我哋都嚟试一试。到餐厅首先要上楼梯，职员应该都是泰国人，不过也能用广东话沟通，我哋叫咗以下菜式:牛肉船面，我一向好钟意食船面，而且上网睇过好多人喺呢度叫船面，船面好多料，有牛腩，牛筋，肥牛，牛丸，非常丰富。牛筋真系炆得好腍，啫喱状，非常好味。牛腩同样都好腍，面个汤底好浓郁，够杰身，而且带点微辣 ，很有惊喜。炒金边粉，金边粉配上三只大虾，大虾爽口弹牙，金边粉炒得够干身，酸味适中，旁边配有花生碎，青柠，芽菜同辣椒碎 ，最惊喜系有虾米，非常惹味。炒通菜，呢碟通菜非常大碟，食到好满足，而且菜亦都好新鲜，食得好滋味。炸鸡翼，餐厅好细心咁将鸡翼剪成单骨，方便客人进食 ，配上泰式酱，而且鸡翼热辣辣，炸得非常香口，鸡翼够嫩滑，非常美味 。饮品方面我哋叫咗泰式奶茶同埋冻柠茶，外表上非常吸引，亦都好好味。埋单𠮶阵侍应会问我哋觉得食物好唔好味，睇得出餐厅用心经营，值得一赞。