食包 (已結業)

朋友推荐咗哩间汉堡好耐，今日行开太子，咁一定要试下。铺头唔大，装修得几温馨，有两张高脚台可以堂食，仲设置有姜涛打卡位，几啱姜涛啲fans打卡。有十几款汉堡同热狗可以选择，今次拣咗肉酱汉堡同黑松露烟肉牛堡，加18HKD可以升级套餐，包埋一份小食同罐装饮品。所有嘢食即叫即整，都唔洗等好耐，就有得食。水牛城鸡翼，系套餐加配，一份有2只，鸡翼炸得脆啵啵，酱汁够多够惹味，酸酸辣辣好食。炸鱼宝，一份有3件，面衣好薄身脆口，鱼肉冇骨好幼滑，点落茄汁一齐食，好味。肉酱汉堡拣咗牛肉，配料劲丰富，有番茄，生菜，芝士，牛肉同煎蛋，肉酱比咗好多，每一啖都食到肉酱，都几得意，好似食紧肉酱意粉，OK㖞。黑松露烟肉牛堡好大一个，有烟肉，鸡蛋，牛肉汉堡扒，芝士，生菜同番茄，同埋劲多黑松露酱。牛肉汉堡扒煎得啱啱好，爆哂juice仲有少少焦香味，鸡蛋都煎得几好，系流心蛋。成个汉堡好重黑松露味，钟意食黑松露啲FD一定唔可以错过。汉堡搭配埋汽水一齐食，真系享受。全部嘢食都可以睇到系用心制作，难怪FD劲推荐啦！