餃里 (悅湖山莊商場) (裝修中)

屋企伙头大将军逢星期三、六都要停工，所以呢两晚都要自己搅掂。但我乐于每星期有两晚，可以唔限区域去找好东西吃。呢晚我就去咗买饺子食。其实呢间饺子外卖店唔近屋企，但我仍然搭车去买。事关呢间饺子店标榜新鲜包，就算买生饺返去煮，第二日煮味道都会大打折扣，唔及佢哋响舖头煮好返屋企即食。 今年农历年后佢哋转咗餐牌，除咗有新饺子，对我最重要系佢哋汤底选择多咗。之前佢哋只有猪骨汤底，而家我爱上咗配素汤底。因为素汤底会跟汤渣，有粟米、萝卜等，非常足料。食埋绝对够饱了。 饺子全部大大只，馅亦好足料，肥肉唔多。椰菜系爽脆嘅，食紫菜最怕啲紫菜洗唔干净有沙，但我食过咁多次都无发生过，我好放心买嚟食。对于芫荽爱好者嚟讲，芫荽饺系不可不吃。芫荽系一样好小器嘅香料，一隔夜味道会大减。呢个饺次次食亲都有好浓嘅芫荽味，我非常满意。 其实呢间舖嘅招牌菜系芝士粟米煎饺。不过我呢排要修身，只能迟啲先食了。