M3 Italian (已結業)

同朋友系附近行下谈心，见差唔多食饭，经过M3 italian，之前系大围食过，未食过沙田围呢间，就入去试下。一入到去，店员非常有礼貌，立刻比左两杯水我地。店入面的环境非常唔错，好有格调，气氛好好，好适合情侣，三五好友去。我地嗌左个意式香草酱海鲜薄批同北海道带子鳗鱼忌廉汁意大利粉。不得不赞，嗌完野食后，店员好快就比左餐包我地，同埋不停加水，态度非常好。我个人非常中意个意式香草酱海鲜薄批。虽然我平时就对薄批兴趣唔大，因为我唔太中意薄批太脆，但食左呢个薄批后，就觉得原来薄批都唔错。首先，佢卖相好吸引，亦都好香。食落去外脆内软，口感十足。佢d料好足，d鱿鱼都好大旧，仲有d小带子同埋虾，配搭香浓芝士味加香草酱，味道香口浓郁，非常唔错。而个北海道带子鳗鱼忌廉汁意大利粉好特别，佢个汁食落甜甜地，有别于一般意粉，我中意佢个酱个浓度啱啱好，d意粉的软硬度都啱啱好，每一条意粉都有浓浓的酱，睇得岀有用心制作。佢d带子真系好大粒，而且佢系有煎过，系香口d，带子亦新鲜，加上其他蕃茄，鱿鱼，蚬等等的配料，味道同视觉上都令我觉得非常好。下次应该会再光临，因为真系好唔错，亦都值呢个价。