茴香 (已結業)

Fennel位置喺山林道，不过系山林道街尾，近𠮶间大陆味好重嘅酒店𠮶边，而唔系近张弥敦道𠮶边，如果冇Openrice根本唔会知道有餐厅，咁既然揾到就约咗同事一齐去试一试。餐厅喺17楼，入到去见到有露台有靓境，可惜已经有人坐低咗，不过都仲有窗口位坐，好似有个沙律吧但系问咗职员佢哋话今日冇。我同同事一人嗌咗个意粉，餐牌上面除咗意粉仲有其他例如咖哩、海南鸡饭、牛扒等等，午市嘅选择都唔少有超过十款唔同嘅菜式。第一碟意粉系「牛油果忌廉汁烧鸡肉宽条面」，成个意粉味道好浓郁，忌廉味几重不过因为有牛油果嘅关系令到佢唔会好腻，配搭几均衡，不足之处应该系份量比较细。另一碟就系「泰国蟹头油大虾带子意粉」，一上到嚟好香，一阵好香嘅虾味同蒜香味，虾肉都好爽口弹牙，不过同上面碟意粉一样比较细份，同埋意粉个汁稀咗少少。跟餐有餐饮，我好闷咁要咗杯冻柠茶就算。总结而言系ok嘅，我谂最大卖点应该系个景，想有靓景位记得早啲嚟。