瘋狂小面 (佳德商業大廈)

营业中

休息中

今日收工后买埋外卖先返屋企，见落完雨天气有啲凉，去左食川菜，叫左个期间限定嘅沸腾二人丰盛套餐，套餐包括沸腾鲈鱼或者沸腾牛肉，同白米饭两碗，多谢$258。我地拣左沸腾牛肉，系即叫即整，都等左四个字先有。牛肉用双重胶袋放好，而两兜饭、饮品同餐具就另外用个纸袋装好，整齐企理。牛肉原来用个类似迷你盆菜兜装好，热辣辣，仲配埋个加热器同加热架俾你。服务员话扭开加热器个盖用火机点火边热住盆牛肉边食，真系外卖都咁有风味，唔怪得叫沸腾牛肉。返到去打开，哗，个迷你盆菜兜包装非常高级，完全唔拍漏汤。牛肉大概有10片，非常嫩口。居然有午餐肉4块，好邪恶。其他配料都好丰富，有大白菜、芽菜、金菇、莲藕片、土豆片同莴笋，莲藕片同莴笋非常爽脆，蔬菜吸左个汤，非常入味。辣度得一个，冇得拣，餐厅用新鲜辣椒红油作为底料，加上唔同干辣椒、花椒粒，最后用高温滚油将辣椒爆香，食落都几辣下。配两份白饭用胶兜装好。另外叫左两罐零系可乐，每罐$12，有雪冻。餐具除左筷子匙羹，居然仲有围裙同湿纸巾，好贴心。食完居然仲有冰粉食，好惊喜，虽然冰粉暖左，不过一样滑溜同足料，上面有花生又有提子干，黑白芝麻粒等等。非常饱肚既一餐。