雲貴軒米線專門店 (已結業)

同细妹漏夜送肥妈入急症室，办完入院手续后已经天光，怀住担忧难过嘅心情，入到呢间餐厅，食个早餐再去上班。呢次系我第三次嚟食早餐，由于心情同胃口都唔好，虽然早餐类别选择颇多，但我都只点咗一碗通粉餐(配反蛋)，饮热华田；细妹就鱼柳餐(配太阳蛋)，饮斋啡。通粉份量足，蛋煎得靓，汤同配料亦好，蕃茄汤中有条粟米，颜色靓之余，感觉几健康！热华田暖笠笠，味道不过不失，为喊得刺痛嘅双眼补充少少水份。细妹份鱼柳餐颇大份，烘多士揾纸袋带走，整体味道ok，唯独杯斋啡细妹话好难饮，饮咗半杯实在顶唔顺！唔系因为送肥妈入医院，我唔会晨早六点几同细妹出街食早餐，庆幸时间早，人唔多，否则我喊到双眼又红又肿，真系吓死人！七点半后，食客开始嚟，之前两次去，试过搭枱，又逼又嘈！所以如果想享用舒适嘅环境同丰富嘅早餐，建议平日早啲去，假日预咗变市集，去到预咗同人逼！P.S.:我想要茄汁，但侍应阿婶竟然话冇！有啲奇怪同失望！