花宵 (已結業)

Suntory，三得利啤酒，食串烧就梗系要嚟番杯日本啤酒爽皮一下，拣选咗三得利生啤酒，口感轻快淡雅，余韵充分表现到啤酒花嘅芳香。日本蕃茄沙律，日本蕃茄新鲜爽甜，份外多汁，沙律汁甜中带酸，同日本蕃茄嘅甜度非常配衬。赤贝寿司，赤贝新鲜，外表呈橙红色而带光泽，肉质爽厚脆嫩，鲜味十足，蝶切令口感爽脆之余亦更见层次。油甘鱼寿司，油甘鱼肉质软身，入口厚实滑嫩，鱼肉细致甘甜，鲜味较重，颜色偏深，好明显用上咗新鲜嘅货式。火炙左口鱼裙边寿司，嚟到我至爱嘅火炙左口鱼裙边，火炙后裙边嘅脂肪被尽数迫出，口感非常丰腴。鸡翼，厨师将鸡翼嘅外皮烧得相当香脆，配合埋嫩滑嘅鸡肉，送酒一流。厚切牛舌串，牛舌厚切，口感份外丰厚，牛味浓重，牛嘅酥香同柠檬汁相当配衬。焦糖菠萝，呢度嘅焦糖菠萝真系令人十分惊喜，佢做到好似有层拔丝喺面咁样，菠萝外层烧得微微焦脆，拔丝焦糖嘅甜味同清甜嘅菠萝相辅相成，赞。