林昌記 (已結業)

呢间林昌记 位于 连接 尖东同红磡嘅天桥中间, 位置就唔算方便啦, 之前想试好耐, 不过每次行到呢个位都已经系 食到饱一饱 今次 特登留肚 终于试到啦。喺天桥中间转入去 呢度有两间 舖头 左手边𠮶间就系林昌记啦, 舖头 细细 只供外卖, 买嘅嘢种类唔多 一眼望晒, 主要就系鱼蛋鱼蛋同埋唔同味嘅鱼蛋  不过正所谓贵精不贵多嘛 , 选择唔需要多最紧要好食。 (墙上poster贴住新品上市 有新出既海鲜炸角 & 海鲜烧卖), 不过眼见个个都叫鱼蛋 羊群心理作祟 我都系叫返鱼蛋好啦。佢哋嘅鱼蛋同我哋平时食开嘅有啲唔同 每一粒都白雪雪滑捋捋 卖相相当唔错, 我呢啲怕辣之人钟意原汁原味就当然系叫原味啦, 唔怕辣嘅你就一定要试下佢哋自家制嘅辣酱啦, 仲有现成一樽樽可以买走。鱼蛋嘅口感同平时食嘅好大分别 咬落 爽口弹牙 完全唔黐牙, 唔会有一种加咗面粉嘅感觉, 味道刚好,唔会过度调味。只系叫左细鱼蛋(十蚊七粒) 都有个杯仔畀你装住 , 唔使拎住串嘢喺条街度 拿手唔成势, 最啱我哋呢啲顾及形象而同时有为食嘅靓女啦。