Youme Cafe (已結業)

小妹唔系小樱Fans，但系主题Cafe对于我嚟讲都有一种难以抵挡嘅吸引力。是日小妹相约朋友一齐去位于荃湾嘅Youme Cafe，呢间Cafe一向以卡通人物做主题，今期就以儿时回忆「百变小樱」做主题。一入Cafe，周围都系小樱人物嘅踪影，墙上、桌椅、装饰、餐牌... ...仲有一排人形纸牌，全部都系打卡位！小妹同朋友一行三人嗌咗三样嘢食，分别系芝士白汁蕃茄肉酱薯仔长粉（＄６２）、便当盒（分别有饭团、肠仔、枝豆、玉子烧、烟肉芦笋卷、草莓、火腿）（＄８８）、芝士汉堡排蕃茄鸡肉烩饭拼米纸沙律＋星形薯饼＋章鱼烧（＄８２），味道一般，同一般Cafe水准无异，完全冇惊喜位，但卖相还算可以。小妹原以为会有人物造型嘅食物出现，例如基路仔形饭团呀咁，点知只系以卡通样米纸取代，令我有啲失望。嘢饮方面，小妹只系嗌咗一杯「雪兔」绿茶（＄３４），热绿茶配上樱饼，米纸上有雪兔哥哥嘅样，制作同样系有啲Hea。不过呢度有样好，就系每嗌一样嘢都会送上一款卡通人物嘅杯垫，作为小樱粉丝嘅朋友好开心，不过小妹就感觉唔大。