森記餐室飯館 (已結業)

上次同朋友嚟食，佢拍晒心口话嚟呢度食一定要食叉烧蛋饭，正式名为「皇袍叉烧饭」，话同亲啲波友喺港岛踢完都必定突登嚟食咁话。因为上次冇影相，今日突登落嚟补返，顺便享受多次。要知道小弟对叉烧（无论港式定日式）我都有要求，除咗肥瘦适中、松软绵密绝不能少，能够有少少㶶边就更为一流。估唔到呢间除㶶边外接近通通做到。而且更系厚切添。虽知叉烧厚切系店主对自己出品嘅叉烧嘅信心表现。坊间快餐店、甚或部份烧味店嘅叉烧一般都系用刀一拍打散啲纤维再切，咁可以令客人感觉啲叉烧易咬冇根，又可以大份啲，其实只系想大家有个错觉。呢间用厚切叉烧就见佢信心无比。另外值得一提嘅系个滑蛋，蛋香四溢，加上个汁同姜蓉嘅配搭，仲点输？但又唔可以唔提嘅一点系厚切叉烧虽然无敌，可惜略嫌冻咗少少，希望店主能够留意，令呢个「皇袍叉烧饭」 - 即滑蛋叉烧饭能更上一层楼。