樂廚私房菜 (已結業)

又系同一班好姊妹聚旧食庆生饭嘅时候， 其中一个姊妹诚意推介食乐厨， 话好难book, 所以早成个月已经book哂枱等食呢餐。经商厦门口上楼上，一入门口见餐厅装修简洁，真系有啲住家feel。入到房，有电视睇，好彩有部电视，唔系呢餐饭啲时间都几难过，因为食咗4个钟， 7点食到11点，唉。。。。。讲返啲𩠌菜， 老实讲，除咗个避风塘炒蟹叫好啲，够味够香之外，其他真系好家常。 个炖汤还可以，有味但生肉煲完嘅血块渣太多，有碍官感！美极虾冇色冇味， 唔合格！扇贝好一般， 好彩有返咁上下大只！ 条鱼好细条，而且仲有泥味同腥味，所以冇咩食过！只沙姜鸡冇沙姜味，似返蒸一样，连诚意推介嘅姊妹都话唔ok! 金沙蚝应该系黄金虾嘅变奏，但呢只蚝一啲咸蛋黄味都冇，唔通就咁用蛋黄嚟做？个炒饭同糖水都俾好普通，不提也罢，但反而佢请我哋食嘅炸蕃薯丸有惊喜， 所以仲想去试嘅朋友可以试下叫呢个甜点！温馨提示，嚟呢度食真系需要同啲好熟同好多话题嘅朋友嚟食，因为真系要食好耐！