七重天餐廳

营业中

休息中

印象中细个嘅时候喺北角食过一间同名嘅餐厅，今晚嚟到筲箕湾再试，出乎意料地好味！我哋叫咗晚市套餐，一个蜜糖烤鸡扒饭，一个厚切盐烧牛脷意粉，每个餐都跟红或白汤、蒜蓉包同埋餐饮，我哋拣咗红汤，简直系惊喜地好饮，红汤味道非常浓郁，带少少辛辣，汤嘅咸唔系落重盐或味精嘅死咸，饮得出喺汤里面嘅材料熬出嚟嘅味道。蜜糖烤鸡超级大块，鸡皮煎到脆卜卜，又有蜜糖嘅甜味，非常香口，鸡肉非常嫩滑，食晒系会有少少滞，但味道非常好！牛脷虽然得两片，但非常厚身，而且煮得好腍，盐烧嘅咸味亦都调校得恰到好处。个人觉得呢间餐厅嘅质素非常好，希望推介俾其他人嚟食，唔好埋没咗好嘅餐厅。