Kazuki Bakery (已結業)

由于好多连锁饼店都唔帮衬，发掘左好多良心小店，呢间小店早排免费派口罩畀有需要嘅人士，回馈社会，最重要系佢嘅茶味蛋糕好出色，系我心目中三甲，虽然价钱稍贵，但一分钱一分货，食得出系用靓料。.丸久小山园抹茶x浓厚日本黑芝麻千层蛋糕:呢款王牌蛋糕近日重出江湖，标榜用日本产芝麻制作，芝麻味果然非常浓郁，每啖都好似食紧芝麻糊咁，蛋糕上嘅抹茶忌廉轻盈软滑，抹味点到即止，但唔会被芝麻味掩盖，中间则夹左特浓丸久小山园抹茶朱古力，呈流心状态，比抹茶忌廉浓苦，回甘相当明显，进一步将茶味带出。睇相可见班戟有超过20层，忌廉涂抹得好平均，班戟皮比ladyM厚少少及偏软熟，口感嘅野各有所好，但味道就一定呢款更胜一筹。Kazuki嘅厉害之处系唔会出现某种材料一面倒嘅情况，芝麻同抹茶相得益彰，相当难得。抹茶贝壳蛋糕:订蛋糕可以用优惠价加购，常温抹茶甜点好多都系有色无味，但呢款一入口抹茶味即时涌现，带少少回甘，质地亦够湿润，烘热左应该会更好食。