Burgeroom (美麗華廣場1期) (已結業)

尖沙咀嘅Burgeroom装修充满工业风，贯彻餐厅走型格路线，落单嘅位置用上路牌显示，玩味十足！餐厅主打burger，有多款选择；牛、鸡、鱼、海鲜，甚至连素食都有提供，选择多多，实在系花多眼乱！餐厅以半自助形式运作，而且全日无加一服务费。入到去坐低咗之后就可以出counter叫嘢食，叫完之后坐返埋自己𠮶位，食物整好后店员就会送过嚟，如果拣樽装或罐装饮品，落单后就要自己响雪柜度拎。餐厅有清水供应但系就要自己出去斟啦。 点咗两款汉堡包加两款小食。牛油果酱芝士牛肉汉堡汉堡包劲大个，份量颇惊人，牛肉好厚，咬落口充满肉汁，而且有浓喐嘅牛肉味。番茄、生菜十分新鲜，配搭车打芝士、千岛酱、牛油果酱，全部加埋一齐令到成𠮶味道提升哂，推介！软壳蟹汉堡原只软壳蟹新鲜炸起，炸浆包裹住鲜甜又多蟹膏嘅软壳蟹，上枱时软壳蟹仍然香脆热辣，配上番茄、生菜等其它食材，层次十分丰富，好味道。旋风薯条炸嘅时间啱啱好，薯条十分香脆，沾上少量嘅茄汁，味道唔错。蜜味辣鸡翼新鲜炸出嚟，超级香脆，鸡翼好鲜嫩，外脆内软，微辣带有少少蜜糖嘅甜味。汉堡包同小食都唔错，而且餐厅环境好有feel，加上店员服务态度好好，适合同朋友嚟倾下偈吹下水！