有魚

营业中

休息中

放工无所事事，即兴约咗哥哥食饭，谂唔到食咩嘅我哋喺荃湾行咗一阵，最后拣咗二坡坊嘅呢间小菜馆。店面唔算大，大概有八张枱左右，但枱同枱之间空间够，感觉唔会好逼夹。除咗小炒同汤粉面饭之外，仲有烤鱼、酸菜鱼、羊腩煲、鸡煲同火锅，选择都几多，我哋挣扎咗好耐，唔知食小菜好抑或食酸菜鱼好，最后拣咗酸菜鱼。等候食物期间，老板好友善咁送上刚炒好嘅花生，又香又脆，仲带住微温。落单后老板问我哋想用火炉上定好似一般酸菜鱼咁，煮好用大盆上菜，我哋拣咗前者，酸菜鱼一上枱非常有震撼性，除咗份量非常大之外，我哋冇谂过系原条鱼上，而且仲要系原条石斑，汤汁带有浓浓嘅酸菜味，味道微辣，非常开胃，同一般食到嘅酸菜鱼好唔同，但的确系另有一番滋味。石斑经过半煎炸，表层酥香，内里软滑，咬落肉质结实，配上酸辣汤汁更添鲜味。除咗石斑之外仲有唔少配料，娃娃菜够鲜嫩，而且吸收哂汤汁嘅味道，非常惹味。云耳大大件，口感清爽，配上酸菜汤汁亦系唔错。鱼嘅底部仲有粗薯粉，佢嘅薯粉口感同一般食到嘅唔同，传统薯粉口感偏向软糯烟韧，呢度嘅薯粉口感清爽，而且煮得耐都能够保持口感。本来想叫多少少嘢食，但见到酸菜鱼嘅份量之后即刻却步，配搭白饭同汽水已经好足够。