浪谷 (AIRSIDE)

营业中

休息中

最近Airside新开咗个室内冲浪场，连住一间泰菜餐厅，即管一试。餐厅座位好近冲浪区，绝大部份位置都可以无遮挡睇晒人哋冲浪，头几分钟好得意🤪，好快就觉得几嘈下🤯，水声大到唔系好听到隔离位朋友讲咩。食物方面，水准以上，有点惊喜。泰式牛肉沙律🥗（$158）份量不少，沙律菜新鲜，酱汁酸辣，牛肉约三成熟嘅粉嫩，入口软绵绵、少少炭烧味。黄豆酱炒椰菜仔（$128）惊喜在唔系原个椰菜仔上（原个卖相可爱，但我啲牙唔系几好，觉得少少硬）。佢系碎开一小嚿咁，混合蕃茄、类似虾米仔嘅脆脆一齐炒，十分香口惹味。青柠辣椒蒸盲𫚧鱼（$258）条鱼新鲜、够大条厚肉，算对得住价钱。只系火略嫌太猛，好快就煮老了，有啲鞋。另外如果你食辣（ME谭x 2小辣），请大胆加辣🌶️🌶️🌶️，因为原味完全唔辣，调味偏酸。芒果🥭糯米饭（好似$78）唔知系唔系时令问题，芒果唔甜唔香、口感好淋，嚿饭同样问题，好似一嚿痴笠笠嘅面团咁，上面嘅椰汁都无味道，不建议叫依道甜品。整体环境舒服阔落，几有东南亚渡假feel，但室内比较嘈，如果想静静哋倾下偈建议坐室外。服务不得不失，叫做合格。